KALIBO, Aklan–Mabahoe nga problema ro pagatugahon it expansion it wind turbine nga proyekto it Petro Wind Energy bukon eamang it sa mainland Malay kundi maging sa isla it Boracay.
Suno kay Gil Delos Santos, community leader sa Boracay sa importante ro kasubaan it banwa it Malay partikular ro Napaan ag Nabaoy river kon sa siin dikara nagabuoe ro mga water concessionaire it andang ginasupply nga tubi sa isla it Boracay.
Angot kara, nagpanawagan si Delos Santos sa lokal nga gobyerno it Malay ag sa mga natungdan nga ahensya it gobyerno nga usisaon it husto ro nasambit nga proyekto antes nga maipatuman raya.
Sa kamatuoran suno kana sa sigidas nga construction it karsada sa nabukid nga parte it Brgy. Napaan ag Nabaoy hay apektado it siltation ro kabaryuhan it Argao, Cubay ag Motag bangud sa sigidas nga pag-inuean.
Maeobog ro tubi sa mga kasubaan bangud sa mga nagadeohog nga eapok maghalin sa mga nabukid nga bahin kon sa siin ro construction it nasambit nga kumpanya.
