KALIBO, Aklan — Nagapapadayun ro imbestigasyon it Bureau of Fire Protection (BFP)-Numancia sa natabu nga sunog sa sangka baraka kaibahan ro tatlong motorsiklo gabi-i it Miyerkules, Setyembre 25 sa Brgy. Bubog, Numancia.
Suno kay FO2 Christian Calzado, Arson investigator it BFP-Numancia nga ginatumod pa nanda kon faulty electrical wiring ro naging rason it sunog kasunod it pahayag it pamilya nga nakaangkon it diperensiya ro linya it andang kuryente ko nagtaliwan nga buean.
Magapadaea sigon sanda it pilang wirings halin sa fire scene agud nga obrahon nga specimen nga igapadaea sa Fire Laboratory Services sa andang national headquarters.
Owa man it napabalita nga naninahan sa nasambit nga sunog kun sa siin natiempo nga owa it tawo sa sueod it baraka kat magtuhaw ro kaeayo.
Maswerte nga owa man nahalitan ro andang baeay sa likod nga portion it baraka.
Ro baraka nga himo sa mixed materials hay ginasugid nga ginapanag-iyahan ni Divine Testa.
Kaibahan sa nadaeahig sa sunog ro tatlong motorsiklo nga naka parking sa lugar.
Ginaboeobanta nga kapin sa P75,000 ro naging danyos it sunog, apang posible pa nga magtaas depende sa igasumite nga affidavit of fire loss it tag-ana.
