Padayun nga ginatumod it Federal Bureau of Investigation ukon FBI kon may kamatuoran ro ginahambae it suspek nga nagsagasa sa mga tawo sa Bourbon Street ko selebrasyon it Bag-ong Dag-on hay konektado sa ISIS ukon makabig raya nga lone wolf pattern.
Raya ro ginpahayag ni Bombo International News Correspondent Mia Estolano Levert it Louisiana, USA.
Suno kana nga gina-claim it suspek nga si Shamsud-Din Jabbar nga miyembro imaw it ISIS ag nagwagayway it bandera it grupo halin sa anang trak.
Sa pihak kara, ro anang mga aksyon sigon hay makabig man nga hilimuon it naga-isaeahanon nga wolf nga posibleng mas naimpluwensyahan it teroristang organisasyon kaysa direktang konektado kara.
Ginasugid nga base sa mga detalye nga ginpaguwa it FBI ag pag-usisa it mga eksperto, si Jabbar hay posibleng naghueag nga naga isaeahanon.
Apang ro imbestigasyon hay unang parte pa eamang suno kana ag posibleng magabag-o pa ro mga detalye.
Dugang pa nga ro anang ginhimo nga pag-atake hay posibleng tuga it personal nga mga problema.
Ginasugid nga ro 42-anyos nga suspek nga taga-Texas hay dating soldado nga gin deploy sa Afghanistan ko 2009 kun sa siin imaw hay nagapangatubang sa diborsyo ag mabahoe nga kautangan.
Samtang, nagsaka eon sa 15 ro death toll samtang dinosena nga iba pa ro naninahan sa vehicle attack sa New Orleans kaibahan ro suspek nga napatay sa shootout it mga pulis.
