Inde eon sigon kinahang-ean nga imbitahan it uman si dating Pangueong Rodrigo Duterte para magtambong sa masunod nga pagpamati it House Quad Committee sa Disyembre 12 angot sa imbestigasyon it extra judicial killings sa kampaniya kontra ilegal nga droga it nakataliwan nga administrasyon.
Raya ro ginpahayag ni House quad-committee overall chairman Surigao del Norte 2nd district Rep. Robert Ace Barbers.
Suno kana, napuga eon it mega-panel ro dating presidente it bastanteng impormasyon.
Buot hambaeon, ro pagtambong ni dating Pangueong Duterte sa committee hearing ko November 13 hay ro una ag ulihi kara nga pagtambong.
Ginpaathag pa it mamalidha nga sa sueod it 13 oras nga pagpamati hay nabatian eon nanda ro mga gusto nandang mabatian kon sa siin pila sa mga raya sigon hay nauna eon nga ginbulgar ukon gin-ako it dating Presidente sa naging pagpamati kato sa Senado.
Madumduman nga sa pagtambong it dating presidente sa pagpamati it Senate Blue Ribbon Committee ko Oktubre 28 hay nagtao it mahabang testimoniya ro dating lider it nasyon.
