Kalibo Aklan ——Baton ni Atty. Edmund Peralta ro pag-terminate kana bilang General Manager it Metro Kalibo Water District (MKWD) board of directors epektibo ko Mayo 18, 2020 matapos ro ginpatigayon nga special board meeting bangud sa ginasugid nga pagkaduea it “trust and confidence.”
Apang ginpamalibaran ro ginahambae nga napas-eawan imaw nga matuman ro mission and vision it MKWD .
Suno kana nga kat nag-umpisa imaw nga magpungko bilang General Nanager ko Enero 2018 hay kapin sa 16,000 pa eamang ro andang konsumidor ,apang raya hay nag-abot eon makaron sa masobra sa 33,000.
Nakapatindog man sigon imaw it building nga owa it utang ag halin sa savings ro gingastos sa construction.
Naging awardee man sigon imaw bangud sa pagdumaea sa nasambit nga water district .
Ginpahalin suno kana imaw nga owa it due process bangud nga owa imaw gintaw-an it kahigayunan nga makapaathag.
Dapat suno kana nga may balido nga rason ro pagpahalin kana ag bukon it ora-orada.
Makaron suno kana nga owa eon imaw sa MKWD hay pagataw-an eon lang nana it oras ro anang pamilya .
Nasayuran nga nakabaehag sa board resolutions – No. 26 ag No. 25 nga pirmado it miyembro nga sanday Engr. George Rovero ag Didi Quimpo, kamana man ni Board Vice Chairman Roselita Sauza, Board Secretary Jean Velarde ag Board Chairman Atty. Ariel Gepty nga owa eon naging epektibo sa pagbuyot it pang adlaw adlaw nga operasyon si Atty Peralta bangud sa anang edad nga 74 anyos eon .
Partikular ro bukon it manami nga kalidad it tubi ag kakueangan it supply kara.
Bukon man sigon nana it obligasyon ro magtambong sa board meeting bilang BOD ex-officio member ag otorisado nga Head of the Procuring Entity (HOPE).
Nagaeaum imaw nga mabuytan it maayos ni Engr. Lydio Ureta, Division Manager B for Construction and Maintenance Division ro anang gin-aywan nga pwesto matapos nga ibutang bilang temporaryong acting MKWD general manager.
Angot kara, nagpasaeamat imaw sa mga miyembro konsumidor sa kahigayunan nga sanda hay maserbisyuhan .
Kipo man ro anang bibig kon may halo nga personal ro pagpatalsik kana .
Nauna eon nga ginreklamo ro water district sa Sangguniang Panlalawigan bangud sa gina-alegar nga mahina nga serbisyo partikular sa banwa it Balete.
