KALIBO, Aklan–Naging madinaeag-on ro gin-organisa nga kasadyahan ni Kalibo Mayor elect Juris Bautista Sucro kabulig ro mga opisyales it Barangay Pook ag iba pang ahensya it gobyerno sa Pook Jetty Port ko Hunyo 24.
Gintawag ni Punong barangay Ronald Marte ro event bilang haead pasaeamat sa kapiestahan ni Sr. San Juan de Bautista ag pagpasaeamat ni incoming Mayor Sucro sa mga Kalibonhon.Makita sigon sa itsura it mga nagtambong ro andang pag-kinasadya sa event.
Natapos sigon it matawhay ro kasadyahan apisar nga gindagsa raya it mga partygoer.Makita man sa lugar ro presensya it Kalibo Municipal Police Station, Kalibo Auxiliary Police, Philippine Coast Guard, Bantay bayan, MDRRMO ag mga opisyal it barangay.
Hugut sigon nga seguridad ro andang ginpatuman para masiguro ro kaeuwasan it mga pumueoyo.
May kaangtanan kara, plano makaron ni Marte nga mas pang i-develop ro nasambit nga lugar.
Sa raya sigon nga pamaagi hay mabuligan ro mga maisot nga negosyante nga makatukod it negosyo sa oras nga maging sambilog raya sa tourism spot it banwa.
Sa kamatuoran suno kana hay naghinyu eon imaw kay Governor elect Joen Miraflores nga ubrahan it development plan ro propiedad it probinsya sa nasambit nga lugar.
Ginsuhestiyon man sigon it pila sa anang kaibahan nga dumaeahan kara ro Committee on Tourism sa oras nga magpungko eon sa pwesto bilang miyembro it Sangguniang Bayan it Kalibo umpisa Hulyo 1.
