Sa sueod it haeos sang siglo, ginadahnan it University of Michigan ro abi nanda hay importanteng dokumento nga handwriting it astronomer nga si Galileo Galilei.
Matapos ro sangka internal investigation, natukiban it unibersidad nga raya hay sangka forged document eamang gali.
Gin anunsyo kan-o eamang it University of Michigan sa media nga ro pinaka-ginadahanan nanda nga Galileo handwritten manuscript hay obra eamang it Italian counterfeiter nga nagahingaean kay Tobia Nicotra.
Si Nicotra hay kilaeang forger ko 1930s sa Milan, Italy.
Mag-eowas sa pagpameke it Galileo documents, kilaea man raya nga naga-obra it fake autographs ni Christopher Columbus at Mozart.
Sueod it mga pekeng dokumento ro mga notes ni Galileo sa imbensiyon nana nga telescope antes nana raya nga ginpresentar sa Duke of Venice ko 1609.
Napasaalima it University of Michigan ro pekeng dokumento matapos raya nga i-donate it sangka manggaranon nga kolektor it mga antigong libro ag dokumento ko 1938.
Nag-umpisa nga kuwestiyunon ro authenticity it manuscript ko Mayo 2022 sa bulig it history professor nga si Nick Wilding.
Nagapatigayon it research si Wilding angot kay Nicotra kat mataeupangdan nana nga may pagkaparehas ro mga forged documents ni Nicotra sa Galileo manuscript nga ginapanag-iyahan it University of Michigan.
Kat ginpaabot ni Wilding ro anang pagduda sa unibersidad, insigidang nagpatiayon it internal investigation ag nakumpirma nanda nga peke ro manuscript.
Napamatud-an nga peke ro manuscript sa bulig it mga eksperto, na-trace nga obra eamang ko 18th century ro papel nga gingamit, samtang 17th century namatay si Galileo Galilei.
Sa makaron hay gina-imbestigahan pa it University of Michigan kun paalin nga iga-presentar sa mga estudyante ag publiko ro fake document.
Naisip nanda nga manami raya nga tun-an it mga gustong mag-research angot sa forgery, hoaxes ag fakes.
