KALIBO, Aklan—Ginaeauman nga magiging masandukot ro hampang sa tunga it Boston Celtics ag Golden State Warriors sa NBA Finals nga maga-arangkada eon sa Biyernes nga adlaw, oras sa Pilipinas sa Chase Center.
Suno kay coach Ritchelle Militar nga bangud nga mas mabahoe ro mga players it Boston, rason nga ro magiging padaog it GSW hay ro andang mga tira sa guwa pinaagi sa mga 3-points ni Stephen Curry kamana man ro andang team play.
Nagapati si Militar nga mas liyamado ro GSW.
Apang kon ma-kontrol it Boston ro scoring nanday Curry ag Klay Thompson nga ginbansagan nga “flash brothers” kaeakip pa si Jordan Poole hay may chansa nga sanda ro maga-kampeon.
Sa pihak nga parte, baeantayan man sigon it GSW ro star player it Boston nga si Jayson Tatum.
Ro parehong team suno kana hay may mga versatile players nga maka-bantay sa nagkaeain-eain nga posisyon.
Ro Boston hay may defensive Player of the Year nga si Marcus Smart samtang ro Golden State hay may una man nga Draymond Green.
Ginasaligan sigon it Celtics ro andang pakpak samtang ro Warriors hay nakadepende sa andang guards.
