KALIBO, Aklan—Ginaeauman nga makaron nga buean it Mayo ukon sa Hunyo hay maga-operate eon ro real-time polymerase chain reaction ukon RT-PCR test kits nga nag-abot ko Biyernes nga adlaw sa Aklan provincial hospital.
Suno kay League of the Municipalities of the Philippines ukon LMP-Aklan chapter president ag Ibajay mayor Joen Miraflores nga pinaagi kara hay mapadasig eon ro pagpaguwa it resulta sa sueod it 24 oras.
Ro nasambit nga machine suno kana hay kaeabanan eon nga ginagamit it mga accredited testing centers sa nasyon.
Ginpahayag dugang nga raya hay sambilog sa mga prayoridad nga proyekto it provincial government agud nga maging haum sa pagsabat sa COVID 19 pandemic.
Umpisa ko buean it Marso suno kana ro mga swab specimens it probinsiya hay ginpadaea pa agud nga ma-test sa Western Visayas Medical Center sa Iloilo City.
Bangud sa backlog hay nagahueat pa it masobra sa sang domingo antes nga makapaguwa it coronavirus results.
Nasayuran nga ro Aklan hay may daywang GeneExpert machines man nga gin donar it Philippine Business for Social Progress.
Raya hay lab-based kit o device, kun sa siin sa sueod it 45 minutos hay sarang eon nga makapaguwa it resulta.
Sa makaron ro nasyon hay nagagamit it tatlong tests agud nga maka detect it covid infection, ro RT-PCR, Gene Xpert ag ro rapid antibody test kits.
