KALIBO, Aklan—Ginahueat pa it Provincial Health Office (PHO) Aklan ro resulta it swab specimen sample it tatlo ka mga empleyado it Bureau of Internal Revenue ukon BIR-Aklan nga nag-positibo sa rapid test.
Suno kay Dr. Cornelio Cuatchon Jr., nga ginpadaea eon nanda sa Western Visayas Medical Center (WVMC) ro swab sample it nasambitang mga empleyado.
Angot kara, nagapabilin nga asymptomatic ukon owa nagapakita it anumang sintomas ro mga raya ag presenteng naka-strict home quarantine.
Ginbutyag man ni Dr. Cuatchon nga ro rapid test hay indi dapat gamiton sa pag-screening, pag-diagnos it Coronavirus Disease ukon COVID-19, back to work requirement ag pati eon man sa travel entry decision.
Dugang pa kara, nauna eon nga ginpaathag it Department of Health nga pwedeng magpaguwa it “false positive” ag “false negative” results ro rapid anti-body test.
Ginarekomenda eamang sigon ro rapid test sa mga ginapatigayon nga research suno sa World Health Organization ukon WHO.
Samtang, sa pihak nga parte, ginpabutyag man ni Dr. Cornelio Cuatchon Jr. it PHO-Aklan nga 21 eon ro nakarecover sa COVID-19 sa probinsya it Aklan kung sa siin ap-at ro active case, sambilog ro naka-admit sa sangka ospital sa probinsya it Ilo-ilo, sambilog ro naka-home-quarantine ag daywa ro naka-facility quarantine.
Gindugang pa ni Dr. Cuatchon nga may guidelines eon sigon ro Department of Health nga indi eon pag-ipaidaeom sa repeat test ro mga raya.
Engkaso sigon nga magpabilin sanda nga asymptomatic sa sueod it 14-diyas hay pwede eon sanda nga makabig nga clinically recovered.
