KALIBO, Aklan—Pinaagi sa sangka resolution, gusto nga pa-imbestigahan ni Kalibo sangguniang bayan member Raymar Rebaldo sa Department of the Interior and Local Government unit ukon DILG ro sangka proyekto nga anang ginakwestiyon nga ginapatuman it Department of Public Works and Highways ukon DPWH nga ginpondohan it Department of Transportation ukon DOTr.
Suno kay Rebaldo nga natukiban nanda sa ginpatigayon nga committee hearing nga owa it nagakaigo nga koordinasyon sa taeatapan ni Kalibo mayor Juris Sucro ag sa mga building officials it LGU-Kalibo ro construction it an-um nga PUV bus stop and waiting station agud nga makataeana it project monitoring team.
Gin-insister ni Rebaldo nga ro proyekto hay nakaangkon it pag-eabag sa DILG circular nga road clearing operation ag sangka circular it Commission on Audit ukon COA bangud sa kawad-an it billboard nga nagapahisayod angot sa kaundan it proyekto para sa kasayuran it publiko .
Sa anang pag-usisa dugang, ginasugid nga ro proyekto hay gin-construct maeapit sa drainage system nga maka-apekto sa gina-iligan it tubi ag pathway nga gina-agyan it tawo partikular sa Mabini St., Barangay Andagao ag Pook sa banwa it Kalibo.
Gindesisyunan sigon it komite nga imandu ro suspension sa pagpatuman it proyekto.
Kaibahan sa ginpasuspinde hay ro ap-at sa an-um nga kabilugan nga proyekto nga gin-umpisahan eon.
Paga istoryahan pa sigon nanda ro masunod nga tikang nga pagahimuon partikular ro dapat nga obrahon sa paghimos sa mga naaywan nga debris ag mga kutkot .
Ginsuhestiyon nana nga padasigan ro paghimos bangud sa pagsueod it tiempo it tag-uean kapin pa ag may paeag it La Niña.
Nasayuran nga kaeakip sa imbitado sa hearing ro mga representante it DPWH Region 6, DPWH Aklan ag Provincial Engineering Office.
