KALIBO, Aklan—Ginapasugtan it Department of Education ukon DepEd ro mga estudyante nga bukon it bakunado kontra sa COVID 19 nga makapasakop sa nakataeana nga uman nga pagbalik it klase sa Agosto 22.
Base sa discrimination policy, ginpahayag ni Dr. Hernani Escullar Jr., tagapaghambae it Department of Education ukon DepEd Region 6 bukon it mandatory ro COVID 19 vaccine sa mga estudyante maskin nga nakataeana eon sanda nga magabalik sa in-person classes sa nobyembre 2.
Sa pihak nga parte, padayun ro andang pag engganyo sa kapin sa 4,093 nga mga manugturo sa bilog nga region 6 nga owa pa nabakunahan kontra COVID 19 nga magpabakuna eon.
Owa pa sigon sanda it nabaton nga official guidelines halin sa central office sa madangatan it andang mga unvaccinated personnels eabi eon ro pagpatigayon it andang work arrangements.
Hugut gihapon suno kana nga igapatuman ro minimum public health protocols, kapareho it pagsuksok it face masks.
