KALIBO, Aklan—Gilayon nga gin-aksyunan it lokal nga gobyerno it Malay pinaagi sa Municipal Environment and Natural Resources Office ukon MENRO ro ginpaabot nga problema it LGU Buruanga angot sa reklamo it mga residente maghalin sa an-om nga barangay it banwa kon sa siin nakakaabot kanda ro masangsang ukon mabaho nga hugom maghalin sa sanitary landfill sa Brgy. Kabulihan mainland Malay.
Suno kay Malay sangguniang bayan member Alan Palma, gin-istoryahan sigon it magtimbang nga mga opisyal pinaagi sa ginpatigayon nga committee hearing ro perwisyo nga tuga it tambakan it basura nga nagaresulta raya sa pagkansela it klase it mga eskwelahan nga maeapit sa lugar.
Naayos eon sigon it MENRO ro sanitary landfill agud nga inde magbaho ro mga ginadaea nga basura maghalin sa centralize Material Recovery Facility ukon MRF sa isla it Boracay.
Ro ECOS Sanitary Landfill and Waste Management Corporation mat-a ro nakakontratang maghakot it basura patabok sa mainland Malay.
Samtang sa pihak nga parte, ginpahayag ni Palma nga pagatinguhaan it LGU nga masolusyunan ro problema eabi eon sa isla it Boracay bangud nga may kahigayunan nga nagakansela man it klase ro eskwelahan maeapit sa MRF bangud man sa mabaho nga hugom it basura nga inde eagi mahakot it hauler.
Pagkasamad it nagahakot nga saeakyan ro pila sa mga ginarason it ECOS kon ham-an it inde eagi nanda mahakot ro basura patabok sa mainland Malay nga nagatuga it mabaho nga hugom.
Madumduman nga makapilang beses eon man nga ginareklamo it mga residente sa lugar ro mabahong hugom maghalin sa MRF bangud nga posible raya nga tunaan it nagkaeain-eain nga sakit.
