KALIBO, Aklan — Nagapabilin nga nakaalerto ag uwa nagata-o it kumpyansa ro gobyerno it Russia sa kinagamo sa tunga nanda it Ukraine.
Suno kay Bombo International Correspondent Geneviv Dignadice it Moscow, Russia nga maskin nabawi eon it Ukraine ro pilang lugar nga nasakop it Russia sa ginpatigayon nga opensiba hay pursigido gihapon ro gobyerno nga masakop ro nasyon.
Uwa pa sigon nagahupa ro tension sa tunga it daywang nasyon bangud nga nagapadayon man ro pakikipagsukoe it Ukraine sa bulig it mga kaalyadong nasyon.
Apang, nagpasugot eon ro Russia nga ibalik ro ap-at nga ongang Ukrainian sa andang mga pamilya.
Ro nasambit nga tikang hay kaparte it tikang nga ginpangunahan it Qatar.
Pinakabatang edad it onga hay ro daywang dag-on samtang ro pinakamagueang hay edad 17 anyos.
Suno sa Ukraine nga may 20,000 nga mga onga ro ginkidnap it Russia halin kat nagsalakay sanda ko Pebrero 2022.
Bangud sa nasambit nga insidente hay ginkasuhan it International Criminal Court si Russian President Vladimir Putin.
