KALIBO, Aklan—Nagaabot sa haeos 500,000 ro mga turistang bumisita sa Isla it Boracay sa unang kwarter it 2024 suno sa Malay Tourism Office (MTO).
Sa datos it taeatapan, umabot sa 137,800 ro foreign tourists nga nagbisita sa isla halin Enero hasta Marso 26.
Samtang, 354,189 mat-a ro nailistang local tourists ag 7,131 ro overseas Filipino workers (OFW) sa nasambit nga period.
Sa pihak nga parte, halin ko Marso 25 hasta makaron nga dominggo it pagkabanhaw hay tayuyon ro ginahimo nga ‘Project Pristine Semana Santa Clean-up Drive’ agud maipakita nga sa pihak it pagdagsa it mga turista hay nagapabilin nga malimpyo ro bilog nga isla ag banwa it Malay.
Ko Biyernes Santo, maabong mga tumueo-o ro nakipagbahin sa pitong kilometrong prusisyun nga nag-umpisa sa Brgy. Manoc-Manoc ag nagtapos sa Brgy. Balabag.
Samtang, ginpasiguro ni Coast Guard Ensign Eulogio Quinto, Deputy Station Commander for Administration it Philippine Coast Guard-Aklan nga hugot nga pagbantay gihapon ro ginapatuman it andang mga tawuhan kapin eon sa beach front ag Caticlan jetty port bangud sa padayon nga pagdagsa it mga turista makaron nga Semana Santa.
Nakahaom sigon ro andang grupo nga umalalay engkasong makaangkon it insidente kamana man ro pag-alalay sa mga magaulian nga mga bakasyunista.
Angot kara, nagpanawagn ro PCG sa mga ginikanan nga bantayan it mayad ro andang mga onga agud maging eowas ro pagdumdom sa kwaresma.
Nauna eon nga ginpahayag it Malay Tourism Office nga ginaeauman nga magaabot sa 50,000 hasta 60,000 ro tourist arrival sa Boracay makaron nga Holy Week.
