KALIBO, Aklan — Hasta nga owa ginabawi it korte ro gin-isyu nga alias warrant of arrest hay magapabilin raya nga epektibo .
Raya ro ginpaathag ni dating provincial board member ag political analyst sa aklan nga si Atty. Harry Sucgang may kaangtanan sa nagapadayun nga operasyon it Philippine National Police (PNP) para matumod ro ginapanaguan it wanted sa laye nga leader it Kingdom of Jesus Christ nga si Apollo Quiboloy.
Ginapatihan it mga awtoridad nga una eamang raya sa compound it KOJC sa Davao City.
Suno kay Atty. Sucgang nga kon may reasonable ground ro mga awtoridad hay pwedeng magpadayun ro andang pag-usoy kay Quiboloy sa sueod it KOJC compound agud nga maiserbi eon ro arrest warrant kontra kana bangud sa mga patung-patong nga kaso kaibahan eon ro human trafficking ag pagpang-abuso.
Hasta nga indi makasakit sa mga miyembro it KOJC ag maka-apekto sa pagpatigayon it religious belief hay indi maakusahan it pag-eabag sa tawhanong kinamatarung ro kapulisan.
Kinahangean eamang sigon nga masunod ro operational procedures sa pagsirbi it arrest warrant.
Sa pihak nga parte, kasunod sa pagkadaop kay dismissed Bamban, Tarlac Mayor Alice Guo sa Indonesia, ginpahayag ni Atty. Sucgang nga matsa mas madali pa nga madakpan ro mga nagapanago nga wanted sa ibang nasyon kaysa sa sueod it Pilipinas .
