KALIBO, Aklan—Naga-abot eamang sa katung-anan it 38 hasta 40 degrees celsius ro heat index sa probinsiya it Aklan.
Suno kay MJ Jizmundo it Provincial Disaster Risk Reduction and Management Office ukon PDRRMO-Aklan nga kumpara sa kaiping nga mga probinsiya sa Western Visayas hay mahagan-hagan ro naeksperyensiyahan nga grabeng init bukon it kapareho it Roxas City ag Iloilo City nga naga-range sa 40 to 45 degrees celcius ro andang heat index nga makabig nga danger level.
Ginpaathag nana nga ro heat index hay ro pagsukat kun ano kainit ro nababatyagan kon ro “humidity” hay ginaeakip sa aktwal nga temperatura it hangin.
Laygay ni Jizmundo nga likawan ro masyadong exposure sa init it adlaw agud nga makalikaw sa nagkaeain-eain nga sakit partikular ro “heat cramp” ag “heat exhaustion” nga pwedeng magresulta sa heat stroke.
Pwede man sigon nga mag-apply it sunblock, maggamit it payong ag kaeo bilang proteksyon sa init it adlaw kamana man nga pirmeng mag-inom it tubi.
Suhestiyon pa nana sa mga laborers nga makaangkon it rest period.
Sa pihak nga parte, pagkatapos it El Niño nga posibleng magabuhay hasta sa Hunyo hay ginapahauman man sigon makaron it PDRRMO ro pagtama it La Niña phenomenon kun sa siin posibleng maka-angkon ro nasyon it mas maabu nga bagyo sa ulihing mga binuean it makaron nga 2024 hasta sa unang buean it 2025.
