KALIBO, Aklan—Gin-aksyunan eon it Municipal Planning and Development Office it lokal nga gobyerno it Kalibo ro may kaangtanan sa isyu nga gina-obra nga negosyo it pilang beneficiary ro gin-award kanda nga mga housing unit it National Housing Authority ukon NHA pinaagi sa pagpa-renta.
Raya hay pinaagi sa expose ni punong barangay Rafael Briones it Briones, Kalibo nga may sangka miyembro it LGBTQ+ community ro nagpa-renta sa anang unit sa balor nga P500 pesos kada buean.
Suno kay Engr. Marlo Villanueva, head it MPDO nga natigayon eon raya nga ma-repaso it legal team it taeatapan ni Kalibo Mayor Juris Sucro ag may nagakaigo eon nga rekomendasyon.
Maabu pa suno kana sanda nga nabaton nga report angot sa mga iregularidad nga nagakatabu sa pabahay nga kinahangean nga maimbestigahan.
Nasayuran sigon it mga beneficiary ro mga patakaran bangud nga antes nanda nga gin-okupahan ro andang unit hay ginpaathag kanda raya.
Nasayuran nga may posibilidad nga pagaboe-on ag pagabayluhan it NHA ro mga beneficiary nga nagapa-renta it andang mga unit nga gina-obra nga paeangitan-an ro pagparenta sa andang units.
Nagakahueugan sigon nga kon owa gina-istaran it orihinal nga benepisyaryo ro anang housing unit hay bukon nana raya it kinahangean.
