KALIBO, Aklan — Ginpabugae it Highway Patrol Group ukon HPG-Aklan nga sanda ro may pinakamaabu nga ginpatigayon nga road clearing operations sa bilog nga Western Visayas.
Raya ro ginpahayag ni P/Staff Sgt. Reniel Bartolome.
Suno kana nga maabu eon man nga mga karsadahon sa banwa it Kalibo ro andang nalimpyuhan partikular sa Tigayon, Estancia, Mabini ag Roxas Avenue, nga kon sa siin owa eon it haeos may naga-parada sa karsada.
Ginpadumdum man nana sa mga motorista ro angot sa “no parking and no standing” nga patakaran sa mga national highway.
Ro sin-o man nga maga-eabag kara hay gina-isyuhan it “notice of violation” nga gina-aywan sa wind shield it mga saeakyan agud nga mag-report sa Land Transportation Office ukon LTO para sa nagakaigo nga multa.
Raya hay para sa mga gin-aywan nga saeakyan nga owa ro driver, apang kon una ro presensiya it naga-maneho hay ginataw-an raya it Temporary Operators Permit ukon TOP ag ginabo-oe ro drivers license.
Samtang, an-um nga van ro andang nasampolan ko nagtaliwan nga adlaw maeapit sa Kalibo International Airport matapos nga mag-parking ro mga raya sa sidewalk.
Nakataeana nanda nga iga-operate sa masunod nga mga inadlaw ro national highway sa western side partikular sa Caticlan ag Boracay.
Maga-isyu man sigon sanda it citation ticket sa mga tricycle nga naga-agi sa tunga it karsada nga gintaeana para sa mga fast moving vehicle.
Kabulig it HPG sa operasyon ro Kalibo Police Station ag iba pang natungdan nga ahensiya it gobyerno.
