KALIBO, Aklan — Nakabulig it mabahoe ro hugut nga pagpatuman it seismic building code it gobyerno it Mexico rason nga nalikawan ro maeapnagon nga kahalitan ag maabung pagkamatay matapos tumama ro magnitude 7.4 nga linog makaron nga adlaw it Sabado.
Suno kay Julius Lerdon, Bombo International News Correspondent sa Mexico nga umpisa nga nag-eontad ro makahaealit nga linog sa nasambit nga nasyon ko 1985 hay ginpatuman ro nasambit nga sueundanan ag regulasyon sa pagdisenyo ag pagpatindog it mga bag-ong building nga hugut nga ginapatuman hasta sa makaron.
Bangud kara, nagapabilin nga matibay ro kaabuan sa mga edipisyo bangud sa ginapatuman nga mga sueundanan sa konstruksyon agud nga makasarang sa mga mabaskog nga pag-uyog.
Dugang pa kara nga matapos ro linog nga nabatyagan man sa Guatemala ag El Salvador hay insigidang nagpatigayon it inspeksyon ro mga opisyal sa mga building ag imprastraktura agud nga masiguro ro kaeowasan it publiko.
Maskin nga may nailistang pilang sangkiri nga kahalitan ag temporaryong pagkaduea it supply it kuryente sa pilang lugar, owa man it napabalita nga maeapnagon nga kasamaran ukon mga namatay.
Ginpahayag pa ni Lerdon nga pirme man nga preparado ro mga pumueuyu sa mga linog bangud sa lokasyon it Mexico sa Pacific Ring of Fire.
