Gin-insister it International Criminal Court (ICC) nga si dating Pangueong Rodrigo Duterte hay may direktang kontrol ag nagtao it suportang pinansyal sa maeapnagong patayan sa idaeom it anang anti-narcotics campaign.
Sa ginpatigayon nga confirmation of charges hearing adlaw it Lunes nga uwa gintambungan ni Duterte, ginpunto ni ICC Prosecutor Mame Mandiaye Niang nga ginapondohan ag personal nga ginatumod it dating presidente ro mga target it Davao Death Squad ukon DDS.
Suno kay Niang, importante ro kontribusyon ni Duterte para ma neutralize ro mga kriminal sa Pilipinas sa pinaagi it pagpatay.
Ginpunto it prosecutor nga mag-eowas sa regular salary, nakakabaton man sigon it cash per head ro mga direktang salarin nga nagasunod sa mando bangud sa kahadlok, pabuya, ukon bulag nga katamparan.
Pamatuod man sigon it eubus nga gahom ni Duterte ro pagnaba it kaso it patayan kat ipasuspinde nana it daywang beses ro operasyon.
Nagapangatubang si Duterte sa tatlong numero it crimes against humanity bangud sa kawad-an it due process para sa mga biktima.
Base sa datos it gobyerno, nagaabot sa 6,200 ro napatay sa drug war, apang ginainsister it human rights groups nga posibleng umabot raya sa 30,000.
Igapadayon ro mga pagpamati sa Pebrero 24, 26, ag 27.
