KALIBO, Aklan—Sa pihak it waea-tuo nga tikang agud nga makabilog it bakuna kontra sa coronavirus disease 2019 ukon COVID-19, importante nga magsunod anay sa protocol it Department of Health agud nga malikawan ro pagkalhit it nasambit nga virus.
Suno kay Dr. Nelly Sucgang, sangka akeanon medical expert, ro pagsuksok it face masks hay magiging kaparte eon it new normal sa Pilipinas.
Mag-eowas sa pagsuksok it face masks, importante man ro pirmeng paghugas it alima, pagsunod sa tamang pag ubo ukon cough etiquette, ag physical distancing.
Ginpahayag ni Dr. Sucgang nga ro nasambit nga mga patakaran hay eubus nga makabulig sa publiko agud nga indi matapnan it makamaeatay nga virus.
Gindugang pa kara nga makabulig man ro paggamit it mga improvised face masks it mga indibidwal nga bukon it medical workers.
Angot kara, ginpadumdum man nana nga mandatory ro pagsuksok it face masks base sa resolusyon nga ginduso it anang asawang si board member Atty. Harry Sucgang kaibahan si board member Emmanuel Soviet Russia Dela Cruz.
