KALIBO, Aklan—Uman nga ginpadumdom ni Provincial Health Officer 1 Dr. Cornelio Cuatchon Jr. nga inde magpakampante ro tanan maskin nga una eon sa low risk ro bilog nga probinsya it Aklan.
Suno kana, may risgo gihapon nga ginapangatubang ro tanan bangud nga mataas ro kaso it Covid-19 sa mga kaeapit nga probinsya.
Maskin nga ginhugtan it uman ro tagsa ka border it mga probinsya hay inde gihapon maduea ro posibilidad nga may maga-travel iya sa Aklan halin sa mga kaeapit nga syudad.
Kaangot kara, makapamayad suno kana nga sundon gihapon ro minimum health protocols kaparehas it paghugas permi it alima, mandatory nga pagsuksok it facemask ag ro pag-obserba sa physical distancing.
Inde sigon kita magpakasiguro sa aton nga mga nakakahalubilo kada adlaw bangud nga inde man naton makit-an ro virus.
Nasayuran nga ginakabig eon nga low risk area ro bilog nga probinsya it Aklan maskin nga ginpabilin raya it national IATF sa modified general community quarantine.
