Padayun ro china sa pag-obra it illegal structures sa West Philippine Sea.
Owa eamang natutukan it media ro andang ginaobra bangud nga nakapokus sa mga nagakatabu sa nasyon sa nagtaliwan nga mga binuean.
Padayun sanda sa pag obra it istraktura sa Panganiban (Mischief) Reef.
Ro Panganiban Reef hay nakasueod sa 370 kilometer exclusive economic zone it Pilipinas.
Owa man nasayuran it kaabuan nga may una eon man nga mga barotong pangisda it Pinoy ro ginsundan it China Coast Guard ag gintabog agud nga indi makapangisda sa teritoryo it Pilipinas.
Ro padayun nga pag obra it China it illegal structures sa mga teritoryong ginapanag-iyahan it Pilipinas hay mabahoe nga hangkat sa administrasyon ni President Ferdinand Marcos Jr.
Pati man ro gina-obra nga pagpang bully ag pagtabog sa mga Pilipinong mangingisda.
Gin-agawan nanda it pangabuhian ro mga makaeoeo-oy nga Pinoy nga pagpangisda ro ginakaboe-an it pangabuhian.
Umpisa nga gin-okupahan it mga Chinese ro mga teritoryo sa WestPhilippine Sea, maabu nga mangingisdang Pinoy ro problemado kun paalin nga mabuhi ro andang pamilya.
Sa kada nagabiyahe sa eawod, ginakoebaan sanda ag gina-isip kon makabalik pa it buhi bangud sa gina-obra it China Coast Guard.
Pilang kahigayunan nga ginbanggaan sanda ag ginbomba it tubi it CCG.
Sa unang State of the Nation Address (SONA) ni Marcos Jr. ko Hulyo, ginhambae nana nga indi eon imaw magapasugot nga makatapak ro sin-o man sa lugar nga ginapanag-iyahan it Pilipinas.
Indi sigon nana iga-give up ro maskin square inch it teritoryo it Pilipinas.
Igapakigsukoe sigon nana ro soberanya it nasyon,
Makaron nana nga pamatud-an ro anang mga promisa.
Makaangkon it posisyon sa gina-obrang pasilidad sa mga teritoryong nadag-an it nasyon sa arbitrary ruling it UN tribunal ko Hulyo 2016.
Suno sa UN nga owa it legal basis ro China sa ginahambae nanda nga historic rights ag sa gina-insister nanda nga 9-dash-line claim sa gina angkon nga teritoryo.
Indi dapat nga maghipos ro nasyon sa nagakatabu sa west Philippine sea ag kawad-an it respeto it China.
Magdesisyon ag magpanindugan sa gina-obra it china sa Pilipinas.
