KALIBO, Aklan — Nakapukaw sa atensyon it Filipino community sa Indonesia ro pagka-aresto kay dismissed Bamban, Tarlac Mayor Alice Guo sa Tangerang City, Jakarta sa nasambit nga nasyon.
Apang suno kay Bombo International Correspondent Rudy Gealogo Celeste, naga-istar ag nagatrabaho sa Tangerang City nga masyadong madahan ro Indonesian authorities sa pagtau it dugang nga detalye sa pagka-aresto kay Guo.
Posible suno kana nga ginatugyan nanda sa Pilipinas ro pagtau it detalyadong impormasyon angot sa nasambit nga isyu.
Hasta nga owa suno kana nakapaguwa it official statement ro gobyerno it Indonesia hay owa raya masyadong ginatalakay sa mga diyaryo, telebisyon , radyo ag social media.
Sa pihak nga parte, ro Tangerang City suno kana hay ginakabig nga international airport it Indonesia ag sambilog sa mga pinakasikat nga siyudad nga ginabisitahan sa nasambit nga nasyon.
Ginpahayag ni Celeste nga sa makaron hay nakabantay ro mga Pinoy sa dugang nga mga impormasyon.
Maskin nga nauna eon nga napabalita nga sa nasambit nga nasyon nag-agto si Guo apang kultura sigon it mga Indonesians ro owa nagabantay sa mga bag-ong salta sa andang lugar ag owa ginapangunahan ro andang gobyerno.
Nauna eon nga ginpaabot ni Justice Assistant Secretary Mico Clavano nga nadakpan si Guo ukon Guo Hua Ping it Indonesian immigration officials bandang ala-1:30 it aga-aga it Miyerkules, Setyembre 4.
Base pa sa nabo-oe nga impormasyon, nagapabilin sa kustodiya it Indonesian Police si Guo.
Nakikipag-angot eon ro Immigration Commissioner it nasyon sa Indonesia para sa insigidang pagbalik ni Guo sa Pilipinas.
