KALIBO, Aklan — Nag-abot sa 7.2% ro inflation rate nga nailista it Philippine Statistics Authority (PSA) sa probinsya it Aklan ko buean it Agosto nga mas mataas kumpara sa 1.9% ko nagtaliwan nga dag-on.
Sa interview it Bombo Radyo, ginpahayag ni Peter Mangilog, information officer it PSA-Aklan, mabahoe ro naging pagtaas sa presyo it mga produkto it aeak ag sigarilyo nga nag-abot sa 23.8%, pati eon sa transportasyon nga may 11.4%.
Raya hay ginsundan it pagtaas it mga Food and Non-Alcoholic Beverages nga nag-abot sa 8.9%, Recreation and Culture nga may 8.3%, Restaurant and Miscellaneous Goods and Services nga may 6.9%, Furnishing and Household Equipment ag House Maintenance nga masobra sa 5.4%, Clothing and Footwear nga nag-abot sa 5.0%, Health nga may 3.4%, Housing, Water, Electricity, Gas and Other Fuels nga 2.5% ag 1.0% sa komunikasyon.
Ro edukasyon eamang sigon ro nagpakita it manabang pagtaas nga may -21.1%.
Ginpahayag pa ni Mangilog nga ro inflation rate sa Aklan ko Agosto ro pinakamataas sa bug-os nga Western Visayas.
