BORACAY Island — Uman nga ginkilaea ro isla it Boracay bilang Best of the Best Beaches in Asia it TripAdvisor, sangka online travel and leisure platform nga nagakilaea sa mga manami nga komento it mga dumueong turista maghalin sa nagkaeain-eain nga nasyon sa bilog nga kalibutan.
Suno kay Kathrine Licerio, tagapaghambae it Malay-Boracay Tourism Office, raya hay kadungganan bukon eamang it para sa banwa it Malay, probinsya it Aklan kundi maging it bilog nga nasyong Pilipinas bangud nga nagaisaeahaon ro Boracay nga nakasueod sa Top 10 nga ginranggo sa ika an-om nga pwesto sa Travelers’ Choice Awards 2026.
Nagpanguna kara ro Banana Beach sa Thailand; ginasundan it Kalingking Beach sa Indonesia; Radhanagar Beach ag Palolem Beach sa India; Mirissa Beach sa Sri Lanka; pang an-om ro Boracay Beach sa Pilipinas; ginsundan it Bentota Beach sa Sri Lanka; Railey Beach sa Thailand; Nusa Dua Beach sa Indonesia ag Cenang Beach sa Malaysia.
Dugang pa ni Licerio, ro nasambit nga pagkilaea hay pamatuod nga nagapanguna gihapon ro Boracay sa mga destinasyon nga gustong maadtunan it mga turista sa pihak it mga hangkat sa sektor it turismo.
Nagaeaum sanda nga magapadayon ro manami nga impression it mga dumueoong eabi eon sa nagahilapit nga summer season.
