KALIBO, Aklan—Eubus nga ginkalipay it lokal nga gobyerno it Malay matapos nga nakasueod sa ikalimang pwesto ro isla it Boracay bilang Best Island in Asia 2024.
Base sa ginpaguwa nga listahan it DestinAsian 17th Annual Reader’s Choice Awards – 2024, nagpanguna kara ro Bali, Indonesia; ginsundan it Maldives; nagpangatlo ro Phuket, Thailand ag nagpang ap-at ro Koh Samui, Thailand.
Nasayuran nga nagapanguna sa listahan it mga dumueoong turista nga bakasyunan ro isla it Boracay kapin eon makaron nga summer season.
Nauna eon nga ginpahayag it Malay Tourism Office nga abuton it hasta sa 60,000 ro pagaeauman nga tourist arrival sa sueod it sang dominggo makaron nga Semana Santa.
Sa pihak kara, nagapadayon ro pagtinguha ag paghimakas it lokal nga gobyerno it Malay, stakeholders ag iba pang natungdan nga ahensya nga kapin pang maipromote ro Boracay agud nga tayuyon ro pagbawi ag pagbangon it industriya it turismo para sa padayon nga pag-umwad it ekonomiya it probinsya it Aklan.
