Ginpaabot ni Israeli Prime Minister Benjamin Netanyahu sa bilog nga kalibutan sa anang pag atubang sa United Nation General Assembly ko raya nga Biyernes nga igapatigayon it Israel ro pagsukoe sa militanteng Hezbollah ag ubos sa Hamas sa Gaza strip hasta maangkon nanda nga mangin madinaeag-on o total victory.
Suno kay Netanyahu, may kadapatunan ro Israel nga isikway ro makara nga paeag ag agod nga maibalik it eowas ro andang mga pamueoyo sa andang mga panimaeay ag raya sigon ro andang ginaubra. Ginapamilit man it Israeli PM nga anda nga igapadayon ro pag-degrade sa militanteng Hezbollah sa Lebanon hasta sa maangkon ro tanan nanda nga ginatuyo.
Ginturo man ni Netanyahu ro Iran g nagiging destabilizing force sa Middle east region bangod sa pagsuporta kara sa Hezbollah ag Hamas. Kaangot kara, ginpaandaman ni Netanyahu ro Iran nga magabaeos sanda kung mag eunsad raya it strike kuntra sa Israel. Dinipensahan man ni Netanyahu ro mga gin eunsad nga air strikes it Israel sa Lebanon kung siin target ro lider it grupo nga si Sheikh Hassan Nasrallah.
Una nga inanunsyo it Israel military nga napatay ro Hezbollah leader sa andang gin eunsad nga air strike sa headquarters it militanteng grupo sa Beirut ko Biyernes apang uwa pa it kumpirmasyon kara ro grupo it Hezbollah. Samtang, sa guwa man it UN General Assembly, naghimo it demonstrasyon ro mga nagaprotesta kuntra kay Netanyahu ag sa mga polisiya it Israel.
Maabo mang mga delegate ro nag-walk out kat nag abot sa General Assembly si Netanyahu kaibahan ro delegasyon it Iran. Ro pag atubang ni Netanyahu sa UN General Assembly hay sa tunga it ginahimong effort it International mediators nga mapunggan ro all out war kung siin una eon nga nanawagan ro US kaibahan ro iba pang kaalyadong nasyon para sa 21 adlaw nga ceasefire sa tunga it Lebanon ag Israel.
