NATIONAL News — Nag-abot eon ro kahalitan sa agricultural sector it nasyon sa P143.47 milyon bangud kay Severe Tropical Storm Kristine (international name: Trami).
Raya ro ginpahayag it Department of Agriculture (DA).
Naapektuhan it bagyo ro 4,798 nga mangunguma ag 3,358 nga ektarya it agricultural areas sa Cordillera Administrative Region, Central Luzon, Mimaropa, Bicol Region, Western ag Eastern Visayas, ag Soccsksargen, nga nagresulta sa production loss nga 8,600 metric tons (MT).
Gindugang pa it departamento nga ro production losses hay ginaboeobanta nga 8,265 MT para sa palay (unhusked rice), 187 MT para sa high-value crops, 102 MT para sa mais, ag 46 MT para sa balinghoy.
Bilang sabat, ginpahayag it DA nga magatau sanda it P531.72 milyong haega it agricultural input halin sa field offices kara sa mga apektadong rehiyon ag P1 bilyon pinaagi sa Quick Response Fund bilang bulig sa pagrekober it mga tinamaan nga lugar.
Nakabaton man ro Survival and Recovery Loan Program it Agricultural Credit Policy Council it P500 milyon halin sa DA agud nga maka-utang ro mga mangunguma it hasta sa P25,000, nga pwedeng bayaran sa sueod it tatlong dag-on ag owa it interes.
Pahayag pa it DA, magapadaea sanda it rice stocks halin sa National Food Authority agud nga ipanupod sa relief efforts it local government units, Department of Social Work and Development, ag iba pang mga ahensya.
Samtang, gin-report it National Disaster Risk Reduction and Management Council nga masobra sa 2.6 milyong indibidawal ro apektado sa bilog nga nasyon, kun sa siin 46 ro nailistang namatay.
