KALIBO, Aklan—Nagtaeana it manugbantay ro barangay council it Bakhaw Sur sa Kalibo dumping site agud nga makita kon ginasunod ro mga panibag-ong instructions angot sa pagtambak it basura sa lugar.
Ginpahayag ni Punong Barangay Bernabe Aquino it nasambit nga lugar nga ro pagbutang it bantay hay kaparte it tikang agud nga matumod kon hugut nga ginasunod ro direkltiba ni Kalibo Mayor Juris Sucro agud nga malikawan eon ro masangsang nga hugum it basura nga nakaka apekto sa mga residente maeapit sa lugar partikular sa andang ikamayad nga eawas.
Umpisa suno kana ko Martes nga adlaw kasunod it uman nga pagpatigayon nanda it ocular inspection ko Lunes kaibahan si Mayor Sucro hay nag-assign imaw it sangka tanod ag kagawad nga naga-bantay ag naga-supervise sa mga dapat nga obrahon.
Nagaserbi sigon sanda nga mata ag dueunggan agud nga ma-update ro operasyon sa dump site.
Ro anuman nga impormasyon nga ginatau kana hay insigida nana nga gina forward kay Mayor Sucro.
Nasayuran nga ginmandu it alkalde base man sa suggestion ni Kapitan Aquino sa mga garbage collector nga imbes nga sa prente it dumping site hay sa likod eon itambak ro mga basura nga ginahakot pasueod ag pagkatapos hay tambakan it eapok ukon baeas.
Ginmandu dugang nga makaangkon it stockpile it baeas agud nga insigida nga may magamit.
Ginabawae eon sigon ro pagpilak sa prente agud nga indi eon magtinaas ro tambak it basura agud nga indi eon mauman ro naeksperyensiyahan nga problema may sang buean eon ro nagtaliwan nga pag angkon it masangsang nga hugum.
