KALIBO, Aklan—Pursigido si Kalibo mayor Juris Sucro nga padayunon ro napurnada nga construction it bag-ong building it Kalibo public market sa mas madali nga tiempo.
Apang suno kay kagawad Mark Sy it Barangay Poblacion, Kalibo nga makaangkon eamang it sangkiri nga revision it plano partikular sa design nga nauna eon nga nabilog sa idaeum it administrasyon ni dating Kalibo mayor Engr. Emerson Lachica.
Gusto suno kana ni mayor Sucro nga mataw-an it kasoehayan ukon makaangkon it mas komportabli nga lugar ro mga vendors ag mga bumaeakae ag mapahagan-hagan ro trapiko sa palibot.
Kaibahan sa plano hay ro pag-ea-ong kay governor Joen Miraflores pinaagi sa sangka resolusyon nga temporaryong magamit ro kahabaon it Toting Reyes St. para sa relocation it mga vendors ag indi eon kinahangean nga magbakae it eugta nga andang pagasayluhan.
Nakataeana man sigon nga paga-mitingon it alkalde ro mga stall owners ag iba pang stakeholders agud nga mabo-oe ro andang parte.
Engkaso nga maging planchado ro tanan, posibleng maumpisahan ro proyekto makaron nga dag-on.
Sa pihak nga parte, gin-umpisahan eon it bag-ong administrasyon ro pag proseso it business permit sa sueod it 24 oras.
Ginaduso it alkalde nga maging business friendly ro banwa it Kalibo.
