Padayon ro preparasyon it Kalibo Pilot Elementary School bilang voting precint ag waiting area kung siin nga 32 nga mga kwarto kara ro pagagamiton.
Raya ro pahayag it KPES School Principal nga si Allan Relloto.
Bilang parte it preparasyon hay may mga ginapahaum sanda nga mga bangko ag barricade kamana man ro mga elektrisidad.
Pahayag nana nga nagsueat imaw kay Mayor Juris Sucro para magpangayo it bulig sa Engineering Department ku LGU Kalibo agud ipaayos ag ipaplastar ro mga linya agud makasiguro nga safe ro eleksyon.
Gintinguhaan sigon nanda nga taw-an it interval ro mga presinto ag waiting area agud malikawan ro mga sangag.
Sa pihak nga parte, bangud sa sunod-sunod nga mga holidays rason nga blended lang sigon ro klase nga pagahimuon.
Maskin ko nagtaliwan nga mga inadlaw hay uwa man it masyadong klase bangud nga nagpatigayon it orientation ro mga manugturo para sa adlaw it eleksyon.
May una sigon nga 40 bilang Board of Electoral Inspector halin sa KPES.
Dugang pa nana nga posibleng sa Sabado hay ma-check sanda kun mag-abot ro mga materyales sa eleksyon.
Dugang pa ni Relloto nga agud nga masiguro ro seguridad hay nakipag-angot eun ro COMELEC sa kapulisan.
Ginapanan-aw man nanda nga posibleng mag-eampas pa sa gintaeana nga oras it botohan ro pag-cater sa ibang botante.
Pahayag pa ni Relloto nga kunta maging matawhay ag madinaeagon ro eleksyon.
Padumdom pa nana sa mga botante nga mag-adto it temprano agud indi sanda kueangon sa oras ag maging matawhay eang.
