KALIBO, Aklan — Nagapanguna makaron sa mga presidential survey sa estado it Chicago si Vice President Kamala Harris kumpara kay dating US President Donald Trump.
Suno kay Bombo International Correspondent Juliana Olmetti it Chicago, USA nga mabaskog makaron ro tandem ni Harris ag ko anang running mate nga si Tim Walz.
Nagapabilin sigon nga mantsa sa pangaean ni Trump ro anang 34 nga kaso bangud sa pagpameke it mga dokumento .
Mag-eowas kara, may kaso pa imaw angot sa insurhensiya ag espionage .
Sa pihak nga parte, naging madinaeag-on sigon ro kampanya nanday Harris sa Milwaukee ag Wisconsin matapos nga tambungan raya it mga linibu nga mga taga-suporta.
Dugang pa ni Olmetti nga maabu man ro nag-abang sa ikaywang 2024 Democratic National Convention sa Chicago kun sa siin gintawag raya nga people power campaign bangud sa numero it mga nagtambong sa rally.
Dikara pormal nga ginbaton ni Harris ro Democratic nomination sa pagka presidente.
Ro balwarte it Wisconsin suno kana hay may mabahoe nga papel sa November 5 presidential election.
Si Harris ro kauna-unahang Black woman ag unang Asian-American nga nagpanguna sa ticket it sangka major political party sa presidential race sa US.
Samtang , apela ni Olmetti nga padayun nga makipag-alyansa ro Pilipinas sa Estados Unidos bangud nga mabahoe ro anang maibulig kara sa pag-umwad it nasyon.
