KALIBO, Aklan—Naga-abot sa 18 nga mga eskwelahan sa bilog nga probinsiya it Aklan ro exempted anay sa full in person classes matapos nga naapektuhan it grabeng pagbaha ko nagtaliwan nga domingo.
Suno kay Dr. Feliciano Buenafe, Jr. Schools Division Superintendent it DepEd-Aklan nga kaibahan sa mga exempted hay ro ap-at nga eskwelahan sa Kalibo 1 District, 6 sa Kalibo II, ap-at sa Madalag District, tig-daywa sa Balete ag Numancia District.
Ginpahayag dugang nga ro mga learners nga owa nakabalik sa eskwelahan hay nagapadayun ro andang pagtuon pinaagi sa modules.
Ginaeauman nga sa Lunes, Nobyembre 7 matapos nga makapanglimpyo hay makapasakop eon sanda sa full in person classes.
Apang ro kahauman it eskwelahan hay iga-assess pa sigon it andang school principal, public school district supervisor ag mga manugturo agud nga masiguro nga eowas ro andang mga estudyante.
Sa pihak nga parte, ginsaluduhan man ni Dr. Buenafe ro mga manugturo nga ginsakripisyo ro andang kabuhi para sa andang propesyon.
Nasayuran nga pila sa mga apektadong manugturo hay naabutan it pagragasa it baha matapos nga gin-una it pag-evacuate ro andang mga estudyante, kun sa siin sa andang pagguwa sa eskwelahan hay hasta eon sa dughan ro tubi-baha.
Bangud kara, owa it nailista nga casualty ro ahensiya sa natabu nga pagbaha.
