KALIBO, Aklan—Kapin sa 30 porsyento pa it mga stall owners sa Kalibo public market ro uwa nakabayad sa anda nga renta.
Bangud kara, ginapursige eon sanda it Municipal Economic Enterprise Development Office ukon MEEDO nga masukot.
Ginpahayag ni Kalibo MEEDO head Mary Gay Joel nga uwa sanda nagkueang sa pagpadumdom sa mga stall owners sa anda nga monthly billing bangud sa mga notice nga andang gina-isyu.
Mag-eowas kara, gintaw-an man sanda it kahigayunan ag ligwa nga maamatan ro andang baeayran bangud nga ko pandemya hay ginpasensyahan man nanda ro mga raya.
Suno pa kay Joel, ro iba sa mga stall owners hay dinag-on eon nga uwa nakabayad ag inde man sanda maisyuhan it bag-ong kontrata sa oras nga inde sanda makabayad.
Ro MEEDO suno kana hay self sustaining department rason nga nagakinahang-ean gid sanda it bastante nga pondo para ipang sweldo sa andang tawuhan.
May kaangtanan kara, plano it MEEDO nga ipaabot kay Kalibo mayor Juris Sucro ro nasambit nga problema agud nga mataw-an it solusyon eabi pa makaron nga prayoridad it alkalde ro pagpadayon sa planong pagpatindog it bag-ong public market.
