Kalibo Aklan —- Gintaw-an it ayuda it lokal nga gobyerno it Malay ro kapin sa 344 nga mga stranded nga mga trabahador sa Isla it Boracay bangud sa ginpatuman nga Enhanced Community Quarantine tuga it coronavirus disease 2019 (COVID-19.
Suno kay Malay Mayor Frolibar Bautista nga gintaw-an nanda it bugas ro nasambit nga mga trabahador nga kaabuan kara hay mga construction workers ag nagatrabaho sa mga tourism establishments.
Pila sa mga raya hay naghalin sa kaiping nga probinsiya it Iloilo, Capiz, ag Romblon.
Nauna eon nga nagpadaea ro lokal nga gobyerno it Panit-an, Capiz it food packs sa andang mga stranded nga pumueuyu samtang nakikipag-angot eon ro Provincial Disaster Risk and Reduction and Management Office it Iloilo sa banwa it Malay agud nga mabuligan ro andang mga kasimanwa.
Gindugang pa ni Mayor Bautista nga ginapasugtan nanda nga makaguwa it Isla ro nasambit nga stranded nga mga trabahador apang mabudlayan sigon ro mga raya nga maka uli sa andang natungdan nga probinsiya bangud sa ginapatuman nga ECQ.
Ro banwa it Malay hay may sambilog nga kumpirmadong kaso it sakit nga sangka 37 anyos nga doktor nga una eon man sa mayad nga kahimtangan ag sambilog nga suspected nga sangka 26 anyos nga eaeaki nga namatay ko Abril 15.
