KALIBO, Aklan—Kasunod sa pagdeklara it tyempo it tag-init, ginaeauman it Malay Tourism Office nga magahakot raya it libo-libong turista sa isla it Boracay partikular makaron nga Semana Santa.
Suno kay Malay Tourism Officer Mr. Felix Delos Santos, kon ikumpara ko nagtaliwan nga dag-on, ginaeauman nga magaabot sa 50,000 hasta it 60,000 ro tourist arrival sa sueod it sang dominggo makaron nga dag-on.
Sa kamatuoran suno kana, ko nagtaliwan nga Marso 1 hasta it 15, umabot sa kabilugan nga 87,377 ro tourist arrival sa sikat nga isla.
Sa nasambit nga numero, 67,772 kara ro mga domestic tourist; 720 ro overseas Filipinos; ag 18, 935 ro foreign tourist.
Nauna eon nga nagconvene ro lokal nga gobyerno it Malay, mga stakeholders ag iba pang natungdan nga ahensya kon sa siin gin-istoryahan ag gintalakay sa pueong ro pagsapinal sa andang ginpahaom nga prepasyon sa pagsueod it summer season nga tyempo sa pagdagsa it maabong turista sa Boracay.
Ginpahayag dugang ni Delos Santos nga buhi-buhi makaron ro isla bangud sa waea-tuo nga pagbalik it mga beach parties.
apang, pag-abot sa Biyernes Santos hay hugot nga ginadumilian ro pagkriar it sangag sa bilog nga banwa kaeakip sa isla it Boracay base man sa nagairal nga ordinansa angot sa pag-obserba sa Semana Santa.
