KALIBO, Aklan–Kapin sa P63,000 ro gin-aywan nga danyos it nag-eontad nga sunog sa sangka panimaeay sa Sitio Diniwid, Brgy. Balabag sa isla it Boracay.
Suno kay FO1 Teody Mark Emilia, imbestigador it BFP-Boracay nga bandang alas-11:05 it udtro adlaw kaina kat makabaton sanda it tawag angot sa nagtuhaw nga sunog sa nasambit nga lugar.
Madasig sigon nga nagkalhit ro kaeayo bangud sa masyadong mabaskog nga hangin sa lugar kamana man nga himo sa light materials ro baeay.
Nabudlayan man sigon sanda nga makasueod bangud medyo pataason ro ginakahimtangan it baeay rason nga ginkinahang-ean nanda nga sugpunon ro pitong ka mga hose halin sa daywang fire truck nanda nga nagresponde.
Nagbuhay it haeos 30 minutos antes nanda eubusan nga nakontrol ro kaeayo.
Ginasugid nga owa it tawo sa baeay kat matabo ro insidente.
Sa makaron hay padayun pang gina-imbestigahan it BFP-Boracay ro rason it sunog.
Samtang, ro pamilya it nasunugan hay presenteng nagatinir sa simbahan sa Brgy. Balabag.
Nasayuran nga raya eon ro ika-an-om nga sunog nga nailista sa Boracay umpisa ko Enero 2023.
