KALIBO, Aklan — Padayun ro pagtaas it mga kaso it dengue sa probinsiya it Aklan matapos nga makalista ro Provincial Health Office (PHO) it 1,143 umpisa Enero 1 hasta Hulyo 27, 2024.
Sa datos nga ginpaguwa it PHO-Aklan, mas mataas ro nasambit nga numero it 75% kumpara sa mga nai-record nga kaso sa kaparehong period ko 2023 nga kapin sa 652 eamang kato.
Mag-eowas kara, nakaangkon man it kaso ro tanan nga 17 nga banwa sa probinsiya.
Pinakamaabung nai-record nga kaso it dengue sa Kalibo nga may 196 nga kaso ukon 34%, kasunod ro Malay nga may 192 nga kaso ukon 1,377% ag ikatlo ro Nabas nga may 89 ukon 39%.
Umpisa ko Hulyo 21 hasta Hulyo 27, kapin sa 154 ro kaso it dengue nga nailista.
Sa bilog nga Aklan, nakalista eon it sambilog nga namatay sa sakit nga ginasugid nga sangka senior citizen.
Agud nga indi eon magtaas pa ro numero it kaso ag pagkamatay bangud sa dengue, gina-engganyo it mga eksperto ro publiko nga maging aware sa mga sintomas it sakit kapareho it gulping pagtaas it eagnat nga posibleng magbuhay it daywa hasta pitong adlaw, sakit sa kasukasuan ag kalamnan, pagpang-euya, rashes sa panit, sakit sa tiyan, pagdugo it ilong kon ro eagnat hay nagapanaba, pagpaeanuka it kulay kape, madueom nga kulay it higku, nabudlayan sa pagginhawa, ag pagsakit it likod it mga mata.
Indi sigon raya pagbalewalaon ag insigidang mag-agto sa pinakamaeapit nga ospital agud nga indi mag-grabe ro sakit.
Kaeakip pa kara ro pagpatigayon it 4S Drive it DOH, kun sa siin ro unang ‘S’ hay ‘Search and Destroy Breeding Places’; Ikaywang ‘S’ hay ro secure self-protection; Ikatlong ‘S’ hay ‘Seek Early Consultation’; ag ika-ap-at nga ‘S’ hay ro ‘Support Fogging or Spraying in hotspot areas’.
