Uman nga ginbuksan sa Senado ro kaso it Mindoro Oil Spill sa ginhimo nga hearing it Senate Committee on Environment and Natural Resources and Climate Change.
Ro mismong komite hay nagpangusisa sa natabo nga pag-eubog it MT Terra Nova sa Limay, Bataan ko rayang Hulyo kasunod it pagdaeasa it typhoon Carina.
Ginkutana ni Sen. Francis Tolentino sa Philippine Coast Guard kung may una eon kara nga nakasuhan sa Mindoro Oil Spill nga natabo pa ko nakataliwan nga dag-on.
Ro kumpanyang nag-charter sa MT Princess Empress hay parehong kumpanya nga nag-charter man sa Terra Nova – SL Harbor Bulk Terminal Corp.
Gusto ni Tolentino nga masayran kung napanabat eon ro tag-iya it MT Princess Empress bangod sa linibong mga mangingisda ro naapektuhan, samtang mabahoe nga parte it katubi-an ag babayon ro nasamad man sa pilang buean nga oil spill.
Bangoud sa uwa makatao it nagakaigo nga sabat ro PCG, kinutana man ni Tolentino ro Department of Justice(DOJ) ag National Bureau of Investigation.
Base sa report it National Disaster and Risk Reduction Management Council(NDRRCM), nag abot sa 43,699 pamilya ro naapektuhan sa pagtagas it eangis halin sa MT Princess Empress samtang ro balor nga daea kara hay umabot sa P4,929,242, 581.74.
Ro mismong tanker hay nagasueod dati it 900,000 litro it eangis nga nagtagas ag nakaapekto sa mga probinsya it Batangas, Palawan, Oriental Mindoro, ag Antique.
