KALIBO, Aklan—Ginaeauman nga mas pang magapabaskog it turismo sa Isla it Boracay ro pagpatigayon it kauna-unahang Puka Shell Festival nga maga-umpisa sa adlaw it Biyernes, Pebrero 9 hasta 11 it makaron nga dag-on.
Raya ro ginpahayag ni Yapak barangay kagawad Fernando delos Reyes.
Suno kana nga pinaagi sa sangka ordinansa hay gintaeana ro festival kadungan it andang kapiyestahan it Our Lady of Lourdes.
Mabahoe sigon ro andang pagpati nga mas pang magabuhos ro mga turista bangud sa festival.
Nasayuran nga natengga ro pagpatigayon it nasambit nga festival nga unang ginlunsar ko 2020 bangud sa pagtama it pandemya nga tuga it COVID-19.
Dugang pa kara nga base sa kasaysayan, nag-umpisa ro sibilisasyon sa Boracay sa Barangay Yapak bangud sa andang tradisyon nga pagkolekta it mga puka shells para sa barter trade ko 1970s.
Mabahoe suno kana ro papel nga ginabuytan it puka shells sa ekonomiya it mga residente it Yapak nga nagasirbi nanda nga pangabuhian eabi eon sa pag-obra it mga accessories kapareho it kulintas ag bracelet bilang souvenir items.
Bangud sigon sa nasambit nga praktis sa pagkolekta it puka shells hay naging sikat ro andang komunidad nga nagresulta sa pagdayo it mga tawo halin sa kaiping nga mga banwa agud nga magpamueot it puka shells.
Ginpamilit pa ni kagawad delos Reyes nga ro ginpabaskog nga turismo sa andang barangay hay magaresulta sa pag-umwad it ekonomiya ag dugang nga trabaho sa probinsiya it Aklan.