Nagpasugot si Knicks guard Jalen Brunson nga batunon ro $156.5 million US dollar contract para sa anang ap-at nga dag-ong extension sa New York.
Ro haega it anang kontrata hay mas manaba it $113 million US dollar kaysa sa dapat kunta nana nga mabaton sa masunod nga season, bilang sambilog sa mga mayad nga guard sa NBA.
Maskin ro kontrata ni Brunson hay mas manaba kaysa sa anang deserve nga sweldo, magaaywan man raya it mas mabahoe nga espasyo ukon financial stability sa Knicks agud makabuoe it iba pang mayad nga NBA players ag magbilog it sangka championship-caliber nga team.
Bangud sa ginhimo ni Brunson hay bumuhos makaron ro pagdayaw kana halin sa kalibutan it NBA.
Komento it maabong mga NBA analyst, pila eamang sa NBA ro nagabaton it pay cut, kapin eon kon kasingbahoe it $100 million US dollar nga bawas sa sweldo.
Ko nagtaliwan nga season, ginpangunahan ni Brunson ro Knicks ag nagsueod sa Playoff sa pihak it uwa paghampang it star player nga si Julius Randle.
Nahimo it Knicks nga pyerdihon ro Philadelphia 76ers sa unang elimination round apang daeayon man nga ginpyerde it Indiana Pacers sa ikaywang elimination.
