Sangka pugante sa Estados Unidos ro natukiban nga nagatrabaho sa Mexico bilang sangka pulis.
Ko 2004, naboe-an it video si Antonio “El Diablo” Riano nga ginbaril ro sangka 25 anyos nga eaeaki nga naka-diskasan kara sa sangka bar sa Ohio.
Ro eaeaki nga gintawag nga “El Diablo” ukon ‘The Devil’ hay nagpaeagiw ag nagpanago. Nagpabilin raya sa listahan it criminal it US sa sueod it haeos 20 anyos.
Ko kan-o eamang, nakit-an sa Facebook it former deputy ro nasambit nga kaso si El Diablo ag nagatrabaho bilang pulis sa Mexican state it Oaxaca.
Insigidang gin-contact it US investigators ro Mexican authorities ag nakumpirma nga si El Diablo ro nagatrabaho bilang pulis sa Zapotitlan Palmas Police Department.
Nagpasugot ro Mexico nga ibalik sa US si El Diablo agud nga mapatuman ro life sentence kontra kana.
Sa pihak it ebidensya nga nabuytan it otoridad, nagpanginwaea pa gihapon si El Diablo sa krimen apang mabaskog man ro pagpanindugan it prosecutors.
Kat ginpangutana imaw kon ham-an nga naging pulis raya sa Mexico, ginpahayag it 72 anyos nga eaeaki nga gusto nana nga magbulig sa mga tawo sa Mexico.
