Ginpagguwa eon it organizers it Metro Manila Film Festival (MMFF) ro ap-at nga nabilin nga pelikula nga magakompleto para sa waeong feature film.
Ginakaeakipan raya it pelikulang “Deleter” halin sa Viva Films ag director Mikhail Red; “Family Matter” halin sa Cineko Productions ag mga director nga sanday Enrico Roque, Ladylyn de Guzman ag Patric Meneses; “Mamasapano: Now It Can Be Told” halin sa Borracho Film Production ag himo ni Lester Dimaranan kamana man ro pelikulang “My Father: Myself” it 316 Media Network ni director Joel Lamangan.
Ro nasambit nga mga pelikula hay ro magakumpleto sa unang ap-at nga gin-anunsyo nga “Labyu With An Accent” ag “Partners In Crime” nga halin sa ABS-CBN Film Productions; “Nanahimik ang Gabi” halin sa Rein Entertainment ag “My Teacher” halin sa Ten17P.
Ginpangunahan it beteranong director Boots Anson-Rodrigo ro pagpili it mga pelikulang makaibahan kung siin kaeakip it category hay 40 percent sa artistic excellence, 40 percent sa commercial appeal; 10 percent sa Filipino cultural values ag 10 percent global appeal.
Ro 48th season it MMFF hay may temang “Balik Saya” kung siin ginpahayag kara nga naging mabudlay ro ginhimo nanda nga desisyon sa pagpili it mga pelikulang maka-intra.
Igapagguwa ro nasambit nga mga pelikula halin Disyembre 25 hasta Enero 7 sa nagkaeain-eain nga sinehan sa nasyon samtang pagahiwaton ro pagpasidungog ukon “Gabi ng Parangal” sa Disyembre 27.
