BANGA, Aklan — Kadungan sa pag-umpisa it tradisyunal nga Simbang Gabi sa Disyembre 15, igapatigayon man ro opening of lights sa banwa it Banga.
Suno kay Banga Mayor Noel Boy Redison nga plantsado eon ro andang preparasyon halin sa programa hasta sa pag-maintain it peace and order sa pagahiwaton nga okasyon.
Sa makaron hay makita sa Teodosio’s park ro padayun nga pag-ayos ag pag-dekorar it mga nagkaeain-eain nga disenyong pang Paskwa nga panigurado nga maka-engganyo it mas maabu nga mga bisita.
Raya hay tiempo sa bag-o eamang natapos nga pagpanami it plaza, kun sa siin nagbutang it play ground para sa mga inunga ag dugang nga mga caleza style nga mga bangko ag lamesa.
Bangud nga kaeabanan nga ginadagsa kada opening of lights ro banwa it Banga, nakataeanang makipagpueong si Mayor Redison sa andang mga punong barangay agud nga magpangayo it dugang nga pwersa pinaagi sa andang mga barangay tanod nga magabulig sa iga-deploy nga mga kapulisan ag mga katapo it Banga Auxiliary Police sa pagbantay sa kalinong ag kaayusan.
Nagaeaum imaw nga malikawan ro kinagamo it mga pamatan-on nga miyembro it mga gang.
Mag-eowas sa ginpatindog nga higanteng Christmas tree ag mga Christmas lights, dugang nga atrasyon ro andang dancing fountain ag fireworks display.
