Kalibo Aklan ——-Gin-umpisahan eon it mga opisyal it Barangay Council it Poblacion Kalibo ro pag distribute it mga consent form para sa mga pumueoyu nga gusto nga magpabakuna kontra sa Covid-19 .
Suno kay Punong Barangay Neil Candelario it Barangay Poblacion Kalibo nga gintugyan nana sa anang mga Barangay Kagawad ro diskarte kon paalin nga mapadasig ro pagsabat sa nasambit nga pormas .
Tuyo sigon it consent form nga indi maeabag ro kinamatarung it mga pumueuyu.
Libre suno kana ro bakuna apang owa man raya it pieilitan .
Sa nasambit nga pormas, igapaathag suno kana sa mga pumueoyu ro klase it bakuna nga igaturok kanda kaibahan ro anang mga benepisyo ag side effects antes nga papirmahonn .
Ro mga nagaduha-duha pa nga magpabakuna hay igabutang sa listahan it mga nagpa-reserve .
Kaibahan sa mga prayoridad nga pagataw-an it bakuna sa banwa it Kalibo hay ro mga healthcare workers, senior citizens, ag mga halin sa pigado nga pamilya.
Kapin sa 50 milyon pesos ro gintaeana nga pondo it LGU kalibo sa pagbakae it bakuna nga obra it AstraZeneca.
Nauna eon nga ginpaathag ni Kalibo Vice Mayor Dr. Cynthia dela Cruz nga ro anuman nga klase it bakuna nga magasueod sa nasyon bilang proteksyon sa COVID-19 hay maid-id nga gin-usisa it Food and Drug Administration (FDA) agud nga masiguro ro pagiging epektibo ag kaeowasan kara sa paggamit it publiko.
