KALIBO, Aklan—Nag-abot eon ko Hulyo 5 ro sangka heavy equipment nga nabakae it lokal nga gobyerno it Kalibo nga ginaeauman nga makabulig sa madasig nga pagau it serbisyo partikular ro paghakot it mga basura sa bilog nga banwa.
Ro bag-ong equipment hay ginaeakipan it dump truck ag may paaeabuton pa nga sangka boom truck.
Suno kay Engr. Marlo Villanueva, head it Municipal Planning and Development Office ukon MPDO nga natigayon eon nanda nga ma-endorso ro nasambit nga mga equipment kay kalibo Mayor Juris Sucro ag Vice Mayor Cynthia Dela Cruz.
Raya suno kana hay nabakae sa idaeum it termino ni dating Kalibo Mayor Emerson Lachica bilang dugang sa mga naga-eksister eon nga units.
Nasayuran nga pila sa mga dating units hay medyu may kalumaan eon ag pirmeng nagakasamad nga nagiging rason it pagka-delay it paghakot it basura rason nga gindesisyunan nga magbakae it mga bag-ong equipment pinaagi sa pagsueod sa loan sa Development Bank of the Philippines.
Pagagmiton man sigon ro mga heavy equipment sa operasyon it municipal engineering office para sa nagkaeain-eain nga programa ag proyektong pang-imprastruktura it lokal nga gobyeno.
Mabahoe sigon ro maibulig it nasambit nga mga heavy equipment agud nga mapabaskog ro lokal nga ekonomiya ag maangkon ro pag-umwad it munisipyo pinaagi sa madasig, mayad ag epektibong pagbuyot ag paghatud it importanteng serbisyo sa mga nasakupan kara.
