KALIBO, Aklan–Nakasumite eon it inisyal nga listahan it mga tricycle driver sa Department of the Interior and Local Government (DILG) ro lokal nga gobyerno it Kalibo.
Ginpahayag ni Dianna Fegarido, Secretary it Sangguniang Bayan it Kalibo nga matapos nanda nga mabaton ro kopya it memorandum circular it DILG-6 ko Abril 22 hay insigida sanda nga nagpatawag it pueong sa mga TODA operators.
Maskin ro mga driver/operator sigon nga bukon it miyembro it TODA hay gintinguhaan nanda nga maabot para maimpormahan angot sa kaundan it igapanupod nga fuel subsidy it gobyerno.
Aminado si Fegarido nga masyadong sukod ro tyempo nga gintao kanda it taeatapan para isumite ro listahan it mga benepisyaryo.
Nag-apela sigon imaw sa DILG nga taw-an it konsiderasyon ro ulihing listahan it mga driver nga andang igasumite.
Ginpaathag man kara nga hasta sa makaron hay padayun ro andang pagbaton it pangaean ag requirements it mga driver apang owa it kasiguraduhan kung pagabatunon pa raya it DILG.
