KALIBO, Aklan—Plano nga buhion it lokal nga gobyerno ro China Street sa bahin it Rizal Street sa banwa it Kalibo.
Suno kay Vice Mayor Dr. Cynthia Dela Cruz nga gusto nanda nga buhion ro mga tourism spot it banwa ag magkriar pa it maabu nga mga negosyo ag trabaho.
Nakipag-istorya eon man sigon sanda sa mga stakeholders apang indi pa raya insigida nga ma-implementar bangud owa pa nataw-an it pondo.
Paga-ubrahan pa sigon nanda raya it ordinansa kamana man nga magapatigayun it public hearing.
Posible sigon nga sa masunod nga dag-on pa maumpisahan ro proyekto.
Pila sa mga ginaeauman nga makit-an sa lugar hay ro pagbutang it Chinese arch, lanterns ag iba pang dekorasyon kaeakip ro pag-activate it mga baealigyaan.
Sa pihak nga parte, masako man makaron ro Sangguniang Bayan sa pag-release it franchise ag pagpatigayun it mga seminar.
Dikara ginaturo sa mga driver ro nagkaeain-eain nga traffic rules para sa euwas nga pagbiyahe ag paghatod sa mga pasahero.
Ginklaro man it bise alkalde nga libreng ginatao ro franchise seminar bangud tuyo kara nga maintindihan ro laye sa karsada.
